Xorvatiya Respublikasının ədliyyə naziri “ASAN xidmət” mərkəzi ilə tanış olmuşdur

20 may 2014-cü il tarixində Azərbaycanda səfərdə olan Xorvatiya Respublikasının ədliyyə naziri Orsat Milyeniç Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan 2 saylı Bakı “ASAN xidmət” mərkəzinin binası və fəaliyyəti ilə tanış olub.

Qonağı salamlayan Dövlət Agentliyinin sədr müavini Ülvi Mehdiyev “ASAN xidmət” mərkəzlərinin yaradılması tarixçəsi, məqsədləri, inkişaf yolu, həyata keçirdiyi xidmət növləri, həmçinin gələcək planlara dair geniş məlumat verib. Bildirmişdir ki, Azərbaycanın məhsulu və brendi olan “ASAN xidmət” mərkəzinin fəaliyyətinin məqsədi dövlət orqanlarının xidmətlərinin göstərilməsində vətəndaşların rahatlığının, şəffaflığın təmin edilməsi, korrupsiya hallarının istisna edilməsi, müasir texnologiyaların tətbiq edilməsi, dövlət qulluqçusu-vətəndaş münasibətlərində yeni düşüncə tərzinin formalaşdırılmasıdır.

“ASAN xidmət” mərkəzlərinin fəaliyyətinin insan hüquqlarının təmin olunması sahəsində mütərəqqi addımlardan biri olduğunu  qeyd  edən  qonaq mərkəzlərin təcrübəsinin tətbiqinin faydalı ola biləcəyini vurğulayıb.