“ASAN xidmət” mərkəzində uşaq hüquqi yardım otağının açılış mərasimi keçiriləcək

20 oktyabr 2014-cü il tarixində saat 14:00-da  Azərbaycan Respublikasının Prezidenti  yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan  4 saylı Bakı “ASAN xidmət” mərkəzində pilot olaraq yaradılmış Uşaq Hüquqi Yardım otağının açılış mərasimi keçiriləcək.

Otaq uşaq hüquqi yardım xidmətlərinin “ASAN xidmət” mərkəzləri vasitəsi ilə həyata keçirilməsi məqsədi ilə UNİCEF-in Azərbaycandakı nümayəndəliyi və Azərbaycan Hüquqşünaslar Konfederasiyasının birgə təşəbbüsü ilə təşkil olunub.

Uşaq Hüquqi Yardım otaqlarının yaxın müddətdə bütün “ASAN xidmət” mərkəzlərində təşkil olunması nəzərdə tutulub.  Bu təşəbbüs çərçivəsində mərkəzlərin hər birinə ixtisaslaşmış uşaq hüquqları mütəxəssisi cəlb olunacaqdır. Layihə Avropa Komissiyası tərəfindən dəstəklənir.