AYİB-in Bakı ofisinin rəhbəri “ASAN xidmət” mərkəzi ilə tanış olub

5 aprel 2016-cı il tarixində Avropa Yenidənqruma və İnkişaf Bankının Azərbaycan ofisinin rəhbəri cənab Neyl Makkeyn 3 saylı Bakı “ASAN xidmət” mərkəzi ilə tanış olub.

Qonağı salamlayan Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov "ASAN xidmət" mərkəzlərinin yaradılması məqsədləri və fəaliyyət istiqamətləri barədə ətraflı məlumat verib.  Qeyd olunub ki, şəffaflığın artırılması və müasir innovasiyaların tətbiqi baxımından “ASAN xidmət”in yaradılması ilə səmərəli dövlət idarəçiliyinin təmin edilməsi sahəsində ciddi naliyyətlər əldə olunub.

Bundan başqa vurğulanıb ki, “ASAN xidmət” Birləşmiş Millətlər Təşkilatının (BMT) 2015-ci il Dövlət Xidmətləri Mükafatına (United Nations Public Service Award 2015) layiq görülüb.

Mərkəzlərdə vətəndaş məmnunluğunun əldə edilməsi istiqamətində arzuolunan nəticələrin əldə edildiyi və 9000 000-a yaxın müraciətin daxil olduğu diqqətə çatdırılıb.

Yaradılmış şərait və iş prinsipi ilə tanış olan cənab N. Makkeyn "ASAN xidmət"in fəaliyyətindən olduqca heyrətlənib  və mərkəzə gələcək fəaliyyətində uğurlar arzulayıb.