Gəncə “ASAN xidmət” mərkəzinin açılış mərasimi keçirilmişdir

21 dekabr 2013-cü il tarixində Gəncə şəhərində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində Gəncə “ASAN xidmət” mərkəzinin açılış mərasimi keçirilmişdir.

Açılış mərasimində Azərbaycan Respublikası Prezidentinin Administrasiyasının hüquq mühafizə orqanları ilə iş şöbəsinin müdiri Fuad Ələsgərov, Gəncə şəhər icra hakimiyyətinin başçısı Elmar Vəliyev və digər qonaqlar iştirak etmişlər.

Gəncə “ASAN xidmət” mərkəzi Gəncə, Şəmkir, Gədəbəy, Daşkəsən, Göygöl, Goranboy, Samux, Naftalan, Kəlbəcər və Xocalı rayonun üzrə  qeydiyyatda olan 1 milyona yaxın vətəndaşa xidmət göstərəcəkdir.

Elektron məlumat mərkəzləri,  elektron rəy sorğusu köşkləri, elektron şikayət köşkü, müasir məlumat  monitorları kimi innovativ yeniliklərin tətbiq olunduğu Gəncə “ASAN xidmət” mərkəzində  150 əməkdaş və könüllü çalışacaqdır.

Həmçinin, mərkəzdə YARAT Müasir İncəsənət Məkanının xüsusi ekspozisiyası və İDEA-nın (Ətraf Mühitin Mühafizəsi naminə Beynəlxalq Dialoq) “Təbiəti qorumağın 10 asan yolu” mövzusunda məlumat löhvələri yerləşdirilmişdir.